Глигор Стојковски

СТАРИТЕ ТАЈНИ

 

Мрачни облаци здивено ги полнат

со непроѕирна вода плитките гнезда –

исчезнуваат топлите воздишки

 

во напуштен замок

накиснати и прогонети

се трупаат бездомни птици

 

оловната вода ги поткопува темелите

на шумските домови –

чиниш секој миг ќе ги снема

 

дојаваа и палави ветришта

ја полнат шумата, го полнат замокот

со себеси и со тешката вода

 

како бледо привидение 

низ просторот кораб едри

новите дни ги носи белокос старец 

 

одамна водите ги чека 

и гневот дамнешен сега што татни

уморна и студена е душата негова

 

не ги трга очите од бесното небо

одговор бара и одговор нуди

– потопите никогаш немале смисла

 

ќе си останат древните камења

на своите места во куќите

со мајчини раце галени

 

и со истите тревки птиците пак 

гнездата ќе свијат

па некоја тивка ноќ

во нив и во првиот сон на децата

– тајните стари ќе ги пластат

 

Напишете коментар

Вашата адреса за е-пошта нема да биде објавена. Задолжителните полиња се означени со *

  • Address: P.O. Box 109
  • Str. Brakja Miladinovci nr.5
  • 6330 Struga
  • Republic of North Macedonia
  • Phone: ++389 46 786 270
  • Fax: ++389 46 786 280
  • Email: struga@svp.org.mk
Copyright 2020 | All Rights Reserved | Струшки вечери на поезијата
©