| Џон Јау

Џон Јау има објавено голем број книги поезија, белетристика и критика. Неговите најнови публикации ги вклучуваат збирката песни „Бижу во темнината“ (2018) и книгата со есеи „Странски звуци или звуци странски“ (2020). Најновите монографии ги вклучуваат „Филип Тааф“ (2018), „Томас Нозковски“ (2017) и „Катерина Марфи“ (2016). Исто така, тој има напишано монографии за Вилфредо Лам, Џоан Мичел, А. Р. Пенк, Џаспер Џонс и Енди Ворхол. Пишувал есеи за голем број музејски публикации и каталози, а објавил и две збирки есеи „Страствениот набљудувач“ (2006) и „Дивите чеда на Вилијам Блејк“ (2017). Во 1999 г. ја основал „Блек сквер едишнс“, мала издавачка куќа посветена на поезијата, белетристиката, преводите и критиката. Тој бил уметнички уредник на „Бруклин реил“ (2007 – 2011) пред да го кооснова онлајн-списанието „Хипералергичен викенд“, каде прави осврти на уметноста, литературата и филмот. Добитник е на бројни награди и стипендии, на пример: од Меморијалната фондација „Џон Гугенхајм“, Националниот фонд за уметност, Академијата на американски поети, Фондацијата за уметност од Њујорк, Фондацијата „Инграм Мерил“ и Фондацијата „Џенерал електрик“. Во 2018, тој е добитник на Наградата за поезија „Џексон“. Именуван е за Шевалиер со Орден за уметност и писма од Владата на Франција. Тој е професор по критички студии во Школата за уметност „Масон Грос“ (Универзитет „Ратгерс“) и живее во Њујорк.


За духот на Жан Виго

Ја почнав песнава набргу откако ја задушив кукавицата скриена во мојот будилник 

Никогаш нема да сркнам супа со букви, дури ни од јазици што не ги разбирам 

Сакам ме опишат како удав кој се однесува искрено и посветено 

Одбивам да добијам путереста нијанса на бледило за да го подобрам тенот 

Сакам да листам со палец низ книги што немаат грб и кориците им се изгорени

Го поздравувам снегот што се простира кон јагленобојниот хоризонт

Не мавтам со перјена шапка пред себе ниту се фаќам за рачката од мечот 

Нема да ја отворам устата да откријам колку реда заби имам 

Секогаш го местам креветот, дури и кога не го оставам и одам на здодевната работа 

Сакам песни што слободно се потат, првокласно прдат и дремливо уринираат 

Не можам да издржам уште една зима во скривница, прашувајќи се кај летна времето 

Ќе ти ги дадам сите свои листови хартија ако ветиш дека никогаш нема да ми пишеш 

Крадам зашто гордо го оставаш на видело и се однесуваш како да не треба да го земам 

Не сакам ни ти ни некој друг да ми ги простува гревовите

(Напишано на 4 јуни, 2020, ден пред мојот 70-ти роденден)

Напишете коментар

Вашата адреса за е-пошта нема да биде објавена. Задолжителните полиња се означени со *

  • Address: P.O. Box 109
  • Str. Brakja Miladinovci nr.5
  • 6330 Struga
  • Republic of North Macedonia
  • Phone: ++389 46 786 270
  • Fax: ++389 46 786 280
  • Email: struga@svp.org.mk
Copyright 2020 | All Rights Reserved | Струшки вечери на поезијата
©