Ова не е живот, Рахела. 

Не знаеш што е подобро – 

да живееш или да умреш. 

Без анестезија, на живо, диво.

Во трка со смртта.

Кој прв стигне. Ние или таа. 

 

Цивилизацијата е поразена, Рахела. 

Колабираше за еден ден. Еден проклет ден. 

Заповедта на Ирод нема ни милост, ни оправдание. 

Твојот плач не се слуша денес, ама 

одекнува плачот на Селма. 

 

Бројот на мртвите деца е бесконечен. 

Толку деца не можат да се сместат на една фреска. 

 

Злосторство е да се молчи, Рахела.

А се молчи, до бесвест и безумие. 

 

Одмаздата е најкусиот пат до истребувањето, 

па сепак се одмаздуваат. Пак и пак. 

 

Од човештвото остана само лелекот 

на ранетите, сираците и бездомниците. 

 

Молете се да преживеат, Рахела, Селма, Хана, Азра… 

Мајчинство му фали на денешниов озлобен свет. 

Рано е за прошка, доцна за опстанок. 

Затоа, не барајте утеха, не е време за утеха.

Молете се да не биде предоцна. 

 

30.10.2023